أريد أن أنبه لواحد المسألة مهمة جدا
99 فالمية من الفاتي فلوغات “المحجبات” – بين قوسين – (حسب الاحصائيات ديال راسي ) كيديروه غير باش يقادو بيه الاستدارة ديال الوجه، سواء كان وجهك عريض، عندك جبهة تضاهي جبهة البوليزاريو، الشعر منتوف من المقدمة، او جيكس، مطيبزة او عندك لحناك..الحجاب التوركي كيلقى ليك الحل، سبنية من لتحت حزمي بيها شعكاكتك مزيان، ثم زيدي عليها فولار من لفوق فشكل مثلث او معين او متوازي الاضلاع، مع اخفاء العرض ديال الفيكورا، والاذنين في حالة كانوا مقلشين، إضافة الى كل ما من شأنه الانقاص من انوثتك وجمالك..ويحبذ الفولارا تكون في اللون الاحمر او اي لون آخر مشعشع، وتاخدي السيلفيات بالقرب من اشعة الشمش مع ديك الطناش ديال النهار الطناش ونص اللاروب الخ الخ..ثم ديريها فالفيسبوك باش تباني كيوت وستيل تركي، ويا حبذا لو تديري اللوغو ديال حزب المصباح ولا شي لعيبة ديال منتدى الشباب ولا الحكومة الموازية ولا شي تصيورات ديال أنشطتك فمجال الاعمال الاجتماعية، وعبري عن رايك فالحكومة واليتيم والعثماني وشي شوية ديال الاقوال ديال احلام مستغانمي، وشي تصويرة مع كوب قهوة، وكتاب “قواعد العشق ام الاربعة والاربعين” ..ومرة مرة لوحي تصويرة ديال شي بولحية مطراسية تركي وكتبي عليها ” قلبي الصغير لا يحتمل”
من بعد ملي تشوفي الرواج مبقاش عاودي حيدي الحجاب وغتلقاي بزاف كيقولو ليك برافو شخصيتك قوية وعندك الجرأة..وغادية تحصلي على بزاف ديال الكومنطيرات وبزاف ديال اللايكات
* ملاحظة : حسب الاحصائيات ديال راسي بزاف ديال هاد المحجبات آ لاموض ميكصليوش اصلا وكيتصاحبو وكيديرو كلشي
* ملاحظة أخيرة : كاين بزاف اللي دايرات الحجاب بصح وعن قناعة وبلا عياقة وميكهضروش عليه وسادين فامهم
ملاحظة ما بعد الاخيرة : أنا ما سوقيش..كل واحد حر فراسو، خوكم غير داوي وصافي
….
تنبيه:كل تشابه في الاوصاف والصور فهو من محض الصدفة لان المغربيات هن الجميلات
*ت. ناجي :كاتب ساخر
