*أحمد الدافري
مللي قرر وحيد البوسني يولي مدرب، بدا يدرب عام 1990 فرقة من بلادو هي فيليز موستار فالدرجة الأولى. ثاقت فيه حيت فيها تكوّن فاللعب، حتى ولى لاعب دولي كيلعب مع يوغوسلافيا قبل ما تتقسم بسبب الحرب الأهلية. مادار والو فجوح مواسم مع هاذ الفرقة.. جراو عليه.. بقى جالس عام كيقلب. والو. وهي تعيط ليه فرقة بئيسة من الدرجة الثانية ففرنسا اسمها بوفي واز . بقى فيها موسم واحد. مادار والو. جراو عليه. ولى مدرب عاطل. من يونيو 1994 وهو شومور.. حتى ليونيو 1997.. هنا جاب ليه الله التيسير. مع من؟ مع إفريقيا.. ومع شمن فرقة فإفريقيا؟ مع الرجاء البيضاوي. الرجاء كانت خذات البطولة فموسم 96/97 مع المدرب الروماني مولدوفان بلاعبين ما بيهومش مقارنة مع اللاعبين ديال البطولة المغربية فذيك الوقت، بحال الحارس الشاذلي، ريمي، فوهامي، جريندو، الحيمر، صابر، البكاري، الرياحي، خاليف، النجاري، مستودع، السلامي، نازير، وأوغانداغا الغابوني للي ما كنتش كنحملو. الإدارة ديال الرجاء ضربها الله وعيطت على وحيد يدربها. القضية كانت فيها تبزنيزة. بالتأكيد.. لأنه ما كانش مدرب معروف نهائيا. كان عاد بغى يقول باسم الله، شوية ولى عاطل كيدور بين القهاوي، عاطل على العمل. جا يدرب إذن الرجاء. لقى الفرقة واجدة. بحال إيلا بغيتي تقول نهار عيطو لغوارديولا يدرب البارصا للي فيها ميسي وتشافي وإنييسطا وعندها هيبة.
المهم وقع وحيد العقد مع الرجاء فيونيو 1997 ولقاها فذيك الوقت متأهلة لدور المجموعات فدوري أبطال إفريقيا ديال الموسم للي فات وكانت فالمجموعة الأولى للي فيها اتحاد الجزائر و بريميرو أغوسطو ديال أنغولا وأورلاو بايراتس ديال جنوب إفريقيا، وتكلاسات هي الأولى فهاذ المجموعة بصعوبة على حساب اتحاد الجزائر بعد ما تساوات معها فعدد النقط ولكن الرجاء كان عندها هدف واحد زايد في نسبة الأهداف وهكذا تلاقات فالنهاية ذهابا وإيابا مع الفريق الأول ديال المجموعة الثانية للي كان هو غولد فيلز الغاني. وسط غانا خسرت الرجاء بهدف لصفر. فمباراة العودة فمركب محمد الخامس،كان ماتش النهاية للي ما عمرني يمكن ننساه. شفتو فالتلفزة المغربية وكان سي سعيد زدوق الجميل هو للي كيعلق عليه. الأرضية كانت خايبة. ولكن الدراري كانوا موالفين بيها. الكرة ما بغاتش تدخل. حتى بقات ربع ساعة تقريبا عاد ماركاها نازير للي كان كرّط الشعر وولى أصلع.. ولينا تعادل.. دزنا لضربات الحظ. صابر وأوغنداغا ضيعو.. وحتى جوج ديال الغانيين ضيعو. الشاذلي كان كيخرج من المرمى وكيوصل تقريبا عند اللاعب الغاني قبل ما يضرب ضربة الترجيح وكبتصدى ليها. وهانية. كان مسموح الحارس يخرج من المرمى ويمشي حتى لعند اللاعب يسلم عليه فاللحظة ديال تنفيذ الضربة. دازو خمسة ديال الضربات.
ولينا فللي ضيع مشى فيها. حنا سجلنا وهوما ضيعو.. والرجاء خذات الكأس الإفريقي الجميل. هاذ الشي كان فشهر ديسمبر 1997. وسي وحيد طلع ليه الشان. خصوصا مللي خذا البطولة فهاذاك الموسم مع الرجاء .
بغى زعما يجدد العقد مع الرجاء بشروط جديدة. قال ليهم راه أنا وليت مطلوب ففرنسا. قالو لبه سير بحالك. وبالفعل امشى بحالو. وجا للرجاء المدرب الجميل الأرجنتيني أوسكار فيلوني وخذات معاه الرجاء البطولة والكأس الأفروأسوية وخذات ثاني كأس دوري أبطال إفريقيا عام 1999. أما السمعة ديال وحيد القرن للي اعطاتها ليه الرجاء خلاتو يمشي يدرب فريق ليل فالدرجة الثانية ففرنسا. مادار والو.. وبقى من هاذ الفرقة لهاذ الفرقة الكأس الوحيد للي خذاه مع شي فرقة فحياتو من بعد الرجاء هو كأس فرنسا مع فريق باريس سان جيرمان عام 2004 وجرات عليه هاذ الفرقة بعد ما دوز معاها عام واحد ومشى يدرب فرقة بئيسة فتركيا اسمها ترابزون.. ومن بعد راكم عارفين.. ولى مدرب معروف.. ودرب منتخبات كوت ديفوار والجزائر واليابان.
الكأس الثمين الوحيد للي فراس مال وحيد خذاه مع الرجاء. كأس خصك تدردك وسط الملاعب الإفريقية باش تديه.. ودابا راه عوال ثاني على الزهر باش ياخذ الكأس مع المغرب.
وهذا ما كان.
*كاتب/صحفي
