*أحمد الدافري
في رأيي، والله أعلم، أن المستقبل ما يمكنش يكون مزيان بيننا وبين باقي الشعوب، إلا إذا ما دخلناش معاها فالحروب..
والنظام الجزائري باغي الشعب المغربي يدخل في حرب مع الشعب الجزائري، باش يعطي مشروعية للحرب ديالو ضد المغرب..
وعلى هاذ الأساس، خص المغاربة يعرفو واحد المعلومة جد هامة.. النظام الجزائري كان عندو مديرية تابعة لوزارة العدل خاصة بمكافحة الجريمة الإلكترونية، وسحب هاذ المديرية من وزارة العدل، وألحقها بوزارة الدفاع في إطار مديرية يرأسها جنرال وسماها “دائرة الإشارات وأنظمة المعلومات والحرب الإلكترونية“..
وراه باين من الاسم ديال هاذ المديرية شنو هو الاختصاص ديالها.. يعني أنها مختصة في الحرب عن طريق الوسائل الإلكترونية.. وإمتى غادي يربحو الجنرالات الحرب؟ ماشي منين غادين يتواجهو مع المغرب عن طريق البوليساريو فالميدان بأسلحة حقيقية. لا.. الحرب بتسخير البوليساريو عارفين أنها مجرد حرب زائفة وما يمكنش يربحوها.. والحرب الحقيقية للي باغيين يربحوها هي الحرب ضد الشعب الجزائري.
لذلك باغيين يخلقو ليه عدو آخر من غير الجنرالات.. وخدامين بخططو كل النهار باش يخليو الحرب تشعل بين الشعب المغربي والشعب الجزائري للي عندي أنا شخصيا فيه أصدقاء عزاز كنعتز بيهم وكيعجبوني..
لذلك.. راه عيب أننا نطيحو فالفخ ونبقاو نهاجمو الشعب الجزائري.. إيلا كانوا شي جزائريين طاحو فالفخ ديال إدارة الجنرالات الخاصة بالحرب الإلكترونية، خصنا حنا نكونو واعيين.. ونتوقفو على هاذيك التفاهات ديال البنان والحليب والسميد وسب الرئيس الجزائري ونشرصور مهينة ليه هو ولباقي الجزائريين .
لأن هذا أسلوب فارغ، ولا يفيد.. ونكونو أذكياء.. نبينو للنظام الجزائري أننا حنا والشعب الجزائري أشقاء. لأن هاذي هي الحقيقة.. ونبينو ليه أن للي ما كيبغيناش وللي كيتآمر ضدنا ماشي هو الشعب الجزائري. بل هو نظام العسكر للي الجنرالات ديالو كيتطاحنو مع بعضياتهم وباغيين يلهيو المواطنين الجزائريين على الإخفاقات الاقتصادية والاجتماعية والسياسية وسوء التدبير.. وهذا ما كان.
*خبير في الاعلام والتواصل
