ولدنا إبراهيم دياز مسكين، في الدقيقة 82 طلب منو أنشيلوتي يوقف جنب الملعب باش يعوض فينيسيوس جونيور.
الحكم الرابع سجل فاللوحة أن الرقم 21 غادي يعوض الرقم 7 في فريق ريال مدريد.
إبراهيم دياز مسيكين وقف حدا الحكم الرابع وبقاو كيتسناو الكرة تخرج خارج الملعب أو الحكم يصفر شي خطأ باش تتوقف الكرة والحكم يعطي الإشارة بإجراء التغيير.
الكرة كانت فرجلين لاعبي ريال مدريد.
ااولاد اللادينا بقاو شادين الكرة فرجليهم أكثر من أربعة دقائق.
من هاذ الرجل لهاذ الرجل.
تقول غير ما بغاوش يكون التغيير.
ما دخل سي إبراهيم مسيكين حتى للدقيقة 86، ملي واحد اللاعب من مايوركا قاس الكرة فالجنب وخرجت خارج الملعب.
ملي دخل، مرر كرة فالدقيقة 90 بين محموعة من المدافعين بهدوء وبطريقة المعلمين الكبار، باش زعما كيليان مبابي ياخذها ساهلة ماهلة ويسجل الهدف..
ولكن واحد المدافع من مايوركا حلف حتى هو للي يقيسها، وسجلها فالمرمى ديالو، وكان هو الهدف الثاني لصالح ريال مدريد.
فالدقيقة 95 سي إبراهيم مسيكين خذا كرة من اليسار وسط الميدان وحطها فالأرض بواحد الكونطرول ديال المعلمين الكبار، ولاح الكرة طوييييييلة للاعب فاسكيس للي بان ليه واقف بعييييييد فاليمين.
فاسكيس لاح الكرة عرضية طويلة جهة مرمى مايوركا. رودريكٌو حط رجلو فالكرة وسجل الهدف الثالث.
وهكذا سي إبراهيم دياز فمدة 9 دقائق قلب الطاولة على مايوركا للي كانت ناوية تغدر ريال مدريد.
برافو عليك سي ابراهيم.
الله يجعل نيتك ديما تغلب.
وهذا ما كان.
*أحمد الدافري
