أبو إلياس التمبوكتي

هاي هاي على “التراكتور” اللي طايرين ليه الروايض، ومْكولي ليه “الموطور”، ومْفرشخة ليه “الشاكمة”، ومقطع ليه لـْفران.. تا هو ناض كاليك، كيهضر على استعمال المال فالانتخابات، والتحكم والسلطوية والسيطرة بْلا بْلا بْلا بْلا ..”الدجاجة غسلات رجليها ونسات ما داز عليها”.

بْغى مسيكين، يدير فيها زعماكينا حزب ديال الملاضلين الأشاوس صحاب “تشي غيفارا”، و” مالكوم إكس”، و”فلاديمير لينين”، وداكشي ديال الثورة البلشفية، والنجمة الحمراء، باش يضرب الناخبين على الشعا، لعل وعسى يصوتو عليه، ويعاونوه يبدل “الموطور لمخرشش” بشي واحد “نحيلة”، يورك على الكسيراتور تا يغبر المسمار.

واخا بيناتنا الخوت..راه “المسمار” الحقيقي، هو هداك اللي تفتقات العبقرية ديالو على هاد الخطة الجهنمية، ديال معانقة حزب الأباجدة، والتحالف مع اللامبة، اللي عاد داك النهار كان كيوصفها بالظلامية والسوداوية والتخلف، والرجعية واللوبية بالتقلية.

أيامات فاش كان الحزب عامر غير  بعشاق، “كسكروط ديال الطون والحرور”، وشي معقودة عافا خويا، وكثر الحار، وشي مولاضا..ويا رفيق رتاح رتاح سنواصل “منعرف شنو “.

وأصلا مشروع الحزب كلو، مجرد رؤية “تالفة” ما عارفة فين تصد،.. والأكيد أن الجمع بين مشروع محافظ الاصالة ” ومشروع حداثي “المعاصرة “، هو مشروع فاشل بكل المقاييس، بحال شي واحد باغي يزوّج لما بالعافية، ويدير ليهم العرس فوق السطح، على أنغام الصوت “البلبلي” و”الشجي”، ديال ولد الصوبة ،وهو يصدح مغنيا “الشاليني يا بابا”..حك جر ..عادا عادا..حك جر آشنو هادا..ترن ترن ترررن.

وهادشي بالضبط هو اللي بغى عوتاني يديرو خونا “وهبي” فهاد الانتخابات، من خلال الجمع بين الأصالة والعدالة والصندالة،  زعما حنا “ماشي بحالهم وهاضاضايضاي” ماشي بحالهم،..

وا ناري على “موضحيكة” الحزب اللي كانو كيتاهموه لخرين بالظلامية، باغي يتحالف مع الحزب اللي كانوا كيتاهموه هادوك بالتحكم، وهادشي كلو، باش يحاربوا واحد “الحزب” اللي ما عمّر شي واحد “اتاهموا بشي ” حاجة، بل على العكس الوزراء ديال نجحو وبالمونصيون فالتجارب الحكومية اللي كانوا فيها. وهادشي الإحصاءات اللي كتكولو ماشي حنا طبعا.

وا راها باينة للعمى فالظلمة، بلي “خونا التراكتور” معول على “لامبة”  باش تجرو معاها للحكومة، أو بعبارة أخرى “الكرعة تحزمات بالفكوسة وبغاو يقطعو الواد”.

الموهيم  را الخوت داخت ليهم الحلوفة وعطاوها غير للتخربيق والتخرميز، ..واللي شاف شي يكول الله يستر، والله يخرجنا من دار العيب بلا عيب.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *