طنجة:le12
كتب مسؤول نقابي من مستخدمي قناة ميدي 1عقب وقفت احتجاجية نظمت صباح اليوم الاربعاء بطنجة، رسالة الى ادارة القناة حررت بالدارجة المغربية، وذاكر احتجاجات منه ربما على عدم فهم الادارة للرسائل السابقة المدونة بلغتي الضاد ومولير..اليكم نص الرسالة..
هاد الوقفة درناها ف إطار مسلسل نضالي بديناه هادي ثلاثة أشهر ، و اجلناها عدة مراة على أمل تحلحل الوضع و تنفيد الإدارة لتعهدها بتوقيع الاتفاقية الجماعية قبل نهاية شهر يونيو
هاد المسلسل بدا من بعد ما خرقات الادارة الجزء الخاص بمنح آخر السنة في الاتفاق الموقع مع الادارة. و القيمة الهزيلة للمنح لي تعطات في سنة عمل استتنائية
و لكن الناس د الادارة ما تطبقش عليهم التقشف و داو البريمات مزيانين مما اقنعنا بأن وعد توقيع الاتفاقية الجماعية حبر على ورق
بغينا اتفاقية جماعية تا تحمر الوجه واطار تنظيمي نخدمو فيه بلا مشاكل فارغة و متكررة و أساليب قمعية من عصر الاستعمار، ديرو للمستخدمين كونطرات تا تحترم القانون و تا ضمن ليهم الحقوق ديالهم
كنا تا نتشكاو من الادارة السابقة على سوء التسيير المالي جاتنا ادارة تا تسطر مشاريع غير واقعية و دون جدوى في جو من العشوائية التسييرية تا تستنزف موارد القناة و تتسبب في الهجرة الجماعية للكفاءات
هاد المشاريع لي تا تستنزف الامكانيات المالية و البشرية على حساب الحقوق الاجتماعية للشغيلة
خاص الادارة تفهم بأن مستخدمي ميدي1 ما تا نلعبوش و قد فمهم قد دراعهم
هاد الشكل النضالي تا يتوجه للادارة نعم، و لكن تا يتوجه للقيمين القناة، واش نتوما راضيين على هاد الشي لي واقع، 3 د القنوات تا يقدمو نفس منتوج و تا تشتت المشاهد.
حنى ما راضيينش على هاد الواقع و تا نحملو الادارة كامل المسؤولية في هاد شي لي وصلنا ليه
الادارة تا تضخم النتائج و تا تسوق واحد الصورة غير واقعية على الانجازات الوهمية ديالها
يلا ما تحققاتش المطالب الوقفة الجاية غا تكون ان شاء الله ف الرباط و بدعم من الجامعة و الاتحاد المغربي للشغل أمام مقر الرباط.
و يلا ما بغاوش نديروها قدام CDG
