كريم البيضاوي
في تطور خايب وغادي يزيد يفرش التخرميز ديال مافيا العقار فالمغرب، قررت صحافية مغربية مقيمة بفرنسا سبق لها فضحت مافيا العقار ، أنها تنقل معاناة عائلة مغربية عبر قناة فرنسية مشهورة.
هاد العائلة المغربية حسب مصادر متطابقة، كان رب الأسرة ديالها شرا شركة من عند مواطن فرنسي..هاد الشركة كضم مجموعة من العقارات بمدينة الدار البيضاء، ولكن المشكل تضيف مصادرنا أن العائلة تفاجأت بعملية سطو مدروسة من طرف مافيا العقار فالمغرب.
المثير في تصريحات أحد أفراد هاد العائلة أنه يتوفر على تسجيلات صوتية لمجموعة من الأشخاص كيشك انهم متورطين فهاد العملية، وهاد التسجيلات يمكن ليها تفك خيوط هاد اللعبة.
المصادر نفسها، كشفت أن القضية تعرضت فالأول من طرف العائلة على أمن منطقة درب السلطان الفداء، قبل متحماض القضية وتوصل للفرقة الوطنية علما أن الملك محمد السادس كان وصى بمحاربة مافيا السطو على العقارات بالمغرب.
هاد القضية غادي تحط خطابات الدولة في محاربة مافيا العقار على المحك خصوصا أن الصحافة الدولية غادي تبع هاد الملف وبدأت فهدشي بجوج مقالات فجريدة “لومند” مؤخرا.
وكتبقى الإشارة أن هاد القضية باتت حديث الصالونات، بين المنعشين العقاريين وهواة اللعب على أوتار مافيات السطو على العقارات بالمغرب.
