أبو إلياس التمبوكتي
غي صبرو ما بقى قد ما فات..
نهار لاربع الجاي نفاريوْها ونتهناو من هاد “الكوشمار” ديال بوغطاط اللي بْقى بارك علينا عشر سنين هادي.
وإن شاء الله غير يْحيّد “البيجيدي” أول دعاء نرفعوه لمولانا، هو يجعل لينا هاد الحكومات ديالو، مغفرة للذنوب راه كرفصونا ماديا ومعنويا.
هاد لخوت قدمو رسوهم للناخب كأشخاص شعبيين كيضربو البيصارة والشفنج ومعقودة فربع، أتقياء ونزهاء.. وملي شدّو فالكراسى شدة لعمى فالظلمة ضربوها لينا بنكرة، وبداو تيصرفو فالمواطن الثأر ديال عام “بوهيوف”، ومحدهم تيطلعو فالسلم الاجتماعي وهوما كيزيدو “يعفسو علينا”.
واللي كيتفكر خرجات “سّيهم بنكيكي” و”الداودي” و لا “السّيهم السكتاني” آه عفوا “العثماني”، ميمكنش يلقى فالخطاب ديالهم شي حاجة من غير التعجرف والاستعلائية، كان باقي ليهم غي شوية ويهزو السمطة باش يسوْطونا.
تيْطحنو فالمواطن ويجيوْ قدّام الميكروفونات يستعرضو لينا الحصيلة ديال الطحين والتجنديخ اللي جندخونا، ها لمدكدك ها لمفرشخ ها لمهرمش ها لمغربل.
بلحق دويوْ علينا وجيوْ علينا..حتى الناس بلاصتْ ينوضو يحاسبوا هاد الرباعة على الكوارث اللي دايرين، تيقلبوها عليهم تمشخير وضحك فالفيسبوك..وأنا أولهم طبعا “الله يسمح ليا”.. داكشي علاش هوما غاسلين يديهم علينا، وتيديرو ويكولو فينا اللي بغاو، ودايرينا فكروشهم.
ولو كان المواطن ناض يحاسبهم، كون صيفطو بنكيران شحال هادي، نهار ناض يكولوينا يلا جاكم “ياغورت” غالي صايبو الرايب فديوركم، والشباب العاطلين اللي ملقاوش خدمة يبعيو البيض.
ولو كانت مثلا ديك الوزيرة السابقة الحقاوي، فشي بلاد آخر، كون صيفطوها بحالها نهار شمتات فضحايا “نساء الصويرة” واتهماتهم باللهطة، ومايخليوْهاش تزيد تمادى فالضحك علينا ملي تقول أن اللي تيصوّر 20 درهم فالنهار ماشي فقير. أو عا الأقل يشدّوها يحيدو ليها 7 المليون اللي كانت تتخلصها فالشهر، ويجردوها من جميع الامتيازات ويخليوْ ليها ربعميادريال فالنهار أو حتى 100 درهم نشوفوها واش تقدر تغطي راسها بالزيوفة ديال “إف سان لورون” كيمّا تتباهى قدام صحاباتها.
ولا هداك خونا الداودي، اللي كاليهم اللي ميكهضرش بالنكليزيية غير يدفن راسو، واللي كيقرا فالشعب الأدبية غير يمشي فين يموت.
ولا داك اللي جاتو المراهقة المتأخرة ومشا كيتمعشق لينا فالشانزليزي، ها اللي لاحت حوايج الخدمة وباركا كتبوزا لينا فوق المولان روج، ها اللي داير لينا “مسلسل تركي” ديال العشق والغرام، فوزارة العلاقة مع البرلمان والمجتمع المدني وزيد وزيد.
الموهيم دابا الخوت ترجلو معانا نهار الاقتراع، وعنداكم تنساو هادشي اللي داروه فينا ودوزوه علينا هاد “الأباجدة”
..ها عار لبزيزيلة
