أبو إلياس التمبوكتي
ناري على بلان شحال كيضحك..غا داك النهار قال حزب البجيدي فواحد الافتتاحية ديالو، بأنو حكا والواد “ترشيح مؤسسة الحزب لقياداتو هو في عدد من جوانبه وبواعثه تجسيد حقيقي لمبدأ ربط المسؤولية بالمحاسبة، وبأن اللي كيخدم فمناصب إنتدابية، خاصو ضروري يقدم حصيلتو للمواطنين”.
إيوا الموهيم، حتى المواطنين معطلوهمش، وبالزربة قدمو ليهم “كشف الحساب”، وقالوا ليهم “ارحل”،..بلاتي آشمن “إرحل” ؟ هاد الكلمة راها حنينة شوية..صبرو نترجموها بالدارجة ديالنا،.. والترجمة الصحيحة هي : “جمع قشاشوك وغبّر علينا كمّارتك”، “رول ماعندو باكاج”..”حْسب الخطوات ومنعاودش نشوفك هنا”،..الموهيم داكشي على حْساب الدكصيونير المستعمل.
وغير البارح خونا “الشوباني” مول “العشق المممنوع”، اللي يصحابليه صافي زعما حيت قاليهم فواحد التدوينة، راني ما نكساب ما نعلام، وعندي غير دار ديال 150 ميترو فراس مالي، غيديرهم فكرشو والمقعد الانتخابي مضمون، ..الساعة اللي فراس الجمل فراس الجمالة . صدموه مسيكين وهو دايز كيتبندر عليهم بالكاطكات ديالو، ما تكول غير شي موكب من مواكب ألف ليلة وليلة.
وحاصروه شباب الجهة، اللي ما حقق ليهم تا “إوزة” من دوك الوعود اللي كان واعدهم، وقالوا ليه “ارحل علينا ما بقيناش باغين نشوفوك ولا نشوفو هاد الحزب ديالكم”.
إيوا بغيتو “ربط المسؤولية بالمحاسبة” ؟ ها هي نعاماس..شفتوها ولا نعاودو نصيفطو ليكم الفيديو فالواتساب ؟
