من خلال فقرة “مشاهير في الكوزينة”، نقدم لكم قراء ومتتبعي جريدتي “خميسة.ما”، و “le12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج والزوجة في تحمل أعباء “الكوزينة”.
حلقة اليوم مع بطل مسلسل “سلمات أبو البنات” “الممثل عمر لطفي:
حاوره: المصطفى الحروشي
*بداية بغينا نعروفوا واش كتعاون مرآتك في الكوزينة في رمضان؟
بالطبع لا.. متندخلش للكوزينة بطبيعة عملي الخدمة بالليل.. لكن أنا بطل العالم في التقديا ههه .. ديما تنجيب إما الناقص أو خضر مطايبش..بصيغة أخرى متيعولوش عليا..
*إلا سولناك أشنو تتوجدوا لطبلة رمضان، أش غادي يكون الجواب ديالك؟
ضروري يكون أتاي و”التغماس” إما طاجين أو لاطة الحوت او حوت كواري أو حوت كفتو..أما الأشياء الأخرى عادية الحريرة لي متتخطاش حتى أسرة مغربية والتمر والحليب والعصير..
*اشنو الشهيوة لي كتقن تطيبها في رمضان؟
ههه أتاي واخا هو مشي أكلة.. وتنعرف نصايب الطجين بالدجاج والبصلة، مهم تنديرو البصلة والدجاج الا كان بلدي أحسن وعطرية وزيت العود.. والا كان الزيتون مزيان وشي حامضة.. لان الحامض مرقد تيعجبني بزاف..
*أشنو تقول للمغاربة في هذا رمضان؟
بغيت نقول للمغاربة رمضان مبارك وأتمنى تكون الإطلالة عليهم في هذا رمضان من خلال المسلسلات لي تتعرضها القنوات ديالنا خفيفة على قلوبهم وتلقى حسن الإستمتاع وتعجبهم، وأتمنى نكون عند حسن الضن ديالهم في هذه الأعمال، وتنقول ليهم من منبركم انتظروني في إعمال جديدة قريبا ان شاء الله.
