من خلال فقرة “مشاهير في الكوزينة”، نقدم لكم قراء ومتتبعي جريدتي “خميسة.ما”، و “le12.ma” عربية، خلال الشهر الفضيل الوجه الآخر لمشاهير من شتى المجالات، وعلاقتهم مع المطبخ خاصة خلال شهر رمضان الكريم الذي يتطلب تعاون الزوج والزوجة في تحمل أعباء “الكوزينة”.
حلقة اليوم مع الحائز على لقب برنامج اكتشاف المواهب الكوميدية “ستانداب” في نسخته الثانية سفيان نعوم:
*بداية بغينا نعروفوا واش كتعاون مرآتك في الكوزينة في رمضان؟
هذا ضروري وواجب علينا.. خاصنا نتعاونوا مع عيالاتنا وخا هما متيحملوناش ندخلو معاهم للكوزينة حيت هما عزيزة عليهم الكوزينة.. ومهما درنا تيجريو علينا..
*إلا سولناك أشنو تتوجدوا لطبلة رمضان، أش غادي يكون الجواب ديالك؟
الحوت ضروري في الطابلة والحريرة وشلاضة والتمر والحليب والعصير.. طائلة رمضان عادية سوسة محضة…
*اشنو الشهيوة لي كنعرف طيبها بها في رمضان؟
نعرف نطيب الطحين.. لكن لي عزيزة عليا سباكيتي وتنعرف نصايبها بالكفتة.. تناخدو الكفتة والبلصة والثوم والعطرية ولاصوص طماطم.. وقبل تنصلقوا سباكيتي في الما وتنديرو معها شوية الزبدة باش متلصقش. ونخلطوا كلشي وتنديرو فوقها الفرماج الأحمر.. طبق ساهل..
*أشنو تقول للمغاربة في هذا رمضان؟
بغيت نقول للمغاربة رمضان مبارك سعيد يدخل على الجميع بالصحة والعافية، وبغيت المغاربة يكونوا متسامحين ويبعدوا من الأنانية ويتاحدوا فيما بيناتهم مشي كل واحد يقول أراسي.. خاصنا نبغي بعضنا البعض باش نزيدوا ببلادنا القدام والله يزول علينا هذه الغمة.. آمين….
حاوره: المصطفى الحروشي
