من خلال فقرة “مشاهير في الكوزينة”، نقدم لكم قراء ومتتبعي جريدتي “خميسة.ما”، و “le12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج والزوجة في تحمل أعباء “الكوزينة”.
حلقة اليوم مع الممثل المغربي عبد الصمد مفتاح الخير:
*بداية بغينا نعروفوا واش كتعاون مرآتك في الكوزينة في رمضان؟
لا متنعاونهمش في رمضان لكن من غير رمضان مرة مرة.. طبيعة العمل ديالي تنخدم في رمضان متيبقاش لي الوقت ندخل نعاونهم.
*إلا سولناك أشنو تتوجدوا لطبلة رمضان، أش غادي يكون الجواب ديالك؟
عادي بحال جميع المغاربة.. غير أنا ظروري يكون الحوت إما السردين أو فواكه البحر.. ومنديش مع الحريرة تنعوضها بالسوبة الخضر صحية وخفيفة.. مع شوي العصير شلاضة تمر الحليب.. هاذاك الشي قدو حدو.. متنبغيش التبدبر وتبقا الماكلة شايطة.. وأصلا أنا تناكل غير خفيف ظريف…
*اشنو الشهيوة لي كتقن تطيبها في رمضان؟
مغديش نقول ليك تنعرف الطواجن لان كلشي تيعرف يطيب الطاجين.. لكن تنتفنن في الطنجية سوا ديال الفرناتشي أو ديال الدار لي تتكون في “الكوكوت” بحالها بحال الطنجية الفرناتشي في المقادير يعني اللحم و الكامون والسمن وزيت العود والخرقوم والحامض مرقض..مع واحد كاس ماء وأحسن إلا كان الفاخراو البوطة مشي موشكيل…وعاد تنعرف نطيب ونصايب الدجاج محمر ومقالي الحوت..
أشنو تقول للمغاربة في هذا رمضان؟
بغيت نقول للمغاربة رمضان مبارك سعيد يدخل على الجميع بالصحة والعافية، ونطلبوا جميع الله يزول علينا هذه الجائحة. باش ترجع الأمور لطبيعتها. وشكرا لجريدة “le12.ma ” و “خميسة.ما” على هذه اللقاء.
حاوره: المصطفى الحروشي
