من خلال فقرة “مشاهير في الكوزينة”، نقدم لكم قراء ومتتبعي جريدتي “خميسة.ما”، و “le12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج والزوجة في تحمل أعباء “الكوزينة”.
حلقة اليوم مع الممثل المغربي رشيد الوالي:
*بداية بغينا نعروفوا واش كتعاون مرآتك في الكوزينة في رمضان؟
بطيعة الحال وخاصة قبل آذان المغرب.. تنوجد معاها الطابلة.. ومشي غير في رمضان راه ملي تنكون في الدار تنعاون مراتي.. وأصلا أنا عزيز عليا نطيب الشهويات..
*إلا سولناك أشنو تتوجدوا لطبلة رمضان، أش غادي يكون الجواب ديالك؟
كيف تتعرف الوقت تبدلات ومع عامل السن والمرض.. لي جاب الله تناكلو.. يضحك ويقول وليت تنبدا بالدواء.. لكن فطورعادي التمر الحليب والعصير مسوس وعاد الحريرة مهم طابلة متنوعة على قد العائلة.
وقال الوالي أنا يوميا تنفطر مع الوالدة لانها مشات عند أختي في هذا رمضان، وتنرجع قبل الساعة الثامنة لداري، حيت مكاينش أحسن من لمة الوالدين.
*اشنو الشهيوة لي كتقن تطيبها في رمضان؟
تنعرف نطيب كلشي، خوك محترف طبخ.. أحسن حاجة هي ملي تنوجد البريك التونسي.. وهي أكلة شفتها في تونس عبارة عن ورقة البسطيلة معمرة بالبيض والطون والبصل والتوابل.. لكن لي تنعرف نطيب مزيان هي الحوت معمر بالزعتر وبطريقة فريدة تناخد سمكة وتنعمرها بالزعتر وزيت العود والعطرية ونفرشو ليها البصل وشوية الحامض من فوق وندخلوها للفران.. ونعرف نطيب الستيك وبطريقة واعرة وعاد الطواجن باللحم أو بالدجاج.
وختم الوالي حواره لمنبر “le12.ma” و”خميسة.ما” تنقول للمغاربة رمضان كريم يدخل على الجميع بالصحة والعافية، ويزول علينا هذه الجائحة.. ومتخليوش الجائحة سبب باش متزروش العائلة وخصوصا الوالدين، كما أدعوا المغاربة إلى التسامح في هذا الشهر شهر الغفران.
حاوره: المصطفى الحروشي
