*عبد الواحد درويش
رسالة للسيد الرايس لحبيب شوباني المحترم..
صباح الخير السي لحبيب و ⴰⵣⵓⵍ ⵖⵉⴼⴽ.
ف هاد نهار الجمعة المباركة للي كبير عند الله، وبعد النتائج النهائية ديال الانتخابات التشريعية الجزئية ف دائرة الراشيدية للي موجودة ف جهة درعة-تافيلالت للي نتا هو الرايس ديالها، كنتوجهو ليك بتحية وسلام باش نقولو ليك شي كلام حيت نتا هو السيد الرايس ديالنا..
السيد الرايس ديالنا السي لحبيب، 
مللي بدات الحملة الانتخابية ديال المرشح ديال الحزب ديالكوم، للي هو بالمناسبة النايب لخامس ديالك ف مجلس جهة درعة-تافيلالت، خلليتي شغالاتك وجيتي تقوم بحملة لفائدة المرشح السي عبد الله صغيري، الله يذكرو بخير. 
مزيان، راه من حقك تساند خوك ف الحزب. ما عندنا منقولو هنا ..  
لكن، سمح لينا السيد الرايس نقولو ليك أننا تبعنا المهرجانات الخطابية الكثيرة للي درتيها ف فايسبوك مع خوتك وخواتاتك ف الحزب وللي، للأسف، خصصتيها كولها تقريبا باش تستعرض داك الشي للي كتسميه “إنجازات” مجلس الجهة للي نتا هو الرايس ديالو. 
إوا هنا سمح لينا بزززززاف.
هاد الإنجازات للي كتقول حققتوها نتا والنائب الخامس ديالك، ولنفترض أنها فعلا كاينة، راها إنجازات ديال مجلس الجهة كامل بأموال الجهة وبمجهودات إدارة الجهة ووكالة التنمية ديال الجهة بتعاون مع ولاية الجهة والمصالح غير الممركزة ف الجهة وزيد وزيد..
دابا، باش تنوض ف دعاية انتخابية ديال لحزب ديالك وتوضف مجلس جهة درعة-تافيلالت كامل، بالأغلبية والمعارضة ديالو، باش تدير حملة انتخابية لفائدة الحزب ديالك بوحدو ف إنتخابات كتهم مجلس النواب، فهذه ما شي أخلاقيات ديال السياسة وديال التنافس الشريف. 
وزايدون، بغينا نقولو ليك حيت نتا رئيس ديالنا كاملين:
– المرشح الشاب حميد نوغو راه ولد لبلاد أصلي، من قبائل أيت خباش المقاومة للي قاومات الإستعمار البرتغالي والفرنسي والتركي، وللي بالمناسبة كان خاصك أخلاقيا تدعمو وتشيد بيه فاش قرر يترشح ف أفقر جهة بالمغرب باش يشجع الشباب على المشاركة السياسية، وخاصة أنه مرشح ضد شيوخ ومحترفي الإنتخابات للي سبق ليهوم كانوا برلمانيين ورؤساء جماعات وما دارو والو غير لكلام لخاوي.. وعوض ما تشجعو وتنوه بيه، درتي ضدو خصيصا حملة من موقعك كرئيس ديال مجلس الجهة إلى جانب وزراء وبرلمانيين ومنتخبين جماعيين… آووووو ، هاد الشي كوللو على ود مقعد ديال 5 أشهر ف مجلس النواب.. !!! 
السيد الرايس السي لحبيب،
راه حنا ما كناش باغين نقولو ليك هاد الشي ف وقت الحملة، لا تنوض عاود تتاهمنا بأننا ذيول ديال الدولة العميقة وداك الشي ديال التحكم والتماسيح والعفاريت والبلوكاج وداك لكلام للي ما يبني دار ما يسقي فدان..
اليوم آ سعادة الرايس ديال جهة درعة-تافيلالت تقاضا لكلام، وحنا هادي شهور رسلنا ليك رسالة تنقولو ليك راكم كاملين ف مجلس جهة درعة-تافيلالت فشلتو ف تحقيق الوعود للي واعدتو بيهوم الناس ديال الجهة، وقلنا ليكوم بزززاف ديال لمرات راكوم كاملين ما صالحينش ومقادرينش تحققو التنمية..
اليوم، ها هي نتيجة عملكم:
ها الساكنة ديال الراشيدية عاقباتكم انتخابيا وحاسباتكم سياسيا، وقالت ليكوم بالعربية تاعرابت: بدلو ساعة بأخرى، سيروا فحالاتكوم..
السيد الرايس ديالنا،
باش نختموا هاد الرسالة الأولى، ومازال رسائل أخرى جايين، ما فيها باس حيت نتا باقي رايس ديال جهة درعة-تافيلالت تنقد ماء الوجه ديالك وتصيفط وتنشر للعموم رسالة تهنئة خاصة وتنويه كبير بسميتك كرئيس جهة درعة-تافيلالت  للشاب حميد نوغو للي استاطع إهزمكوم كاملين: حكومة وبرلمانا وجهة ومجلس إقليمي وجماعات ترابية..
راه السي حميد، وحق سيدي ربي، إلا كيستاحق نفتاخرو بيه جميعا، وأول للي خاص يفتاخر بيه وبالشباب للي معاه هو السي لحبيب شوباني، الرايس ديال جهة درعة-تافيلالت..
إوا ما تديهاش منا قلة الصواب، وما تقلقش بالززززاف، راه الوقت كتبدل وراها وقت الشباب هادي..
إوا خلليناك على خير وسنة أمازيغية سعيدة 2971.. ⴰⵙⴳⵯⴰⵙ ⵉⵖⵓⴷⴰⵏ ..
✌🤔⚘
*ناشط حقوقي أمازيغي 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *