هم شخصيات من عالم السياسة والمال والأعمال، ومشاهير ونجوم في ميادين الرياضة والفن والثقافة، منهم من تواصلنا معه وتقاسمنا انشغالات واهتمامات وأجرينا حوارات، ومنهم من لم تسمح ظروف الواقع باستضافتهم واللقاء بهم إلا على بساط الخيال.
الجريدة الالكترونية LE12.MA، تنقلكم خلال الشهر الفضيل، إلى عوالم بعيدة عن الواقع قريبة من الخيال .. في حوارات ساخرة، لكن ماشي حقيقة..
ضيف اليوم هو نبيل بنعبد الله الوزير السابق والامين العام لحزب التقدم والاشتراكية الغني عن التعريف .. وكنقولوا ليه “وسع قشابتك”، ونقول للجمهور كذلك، كل علاقة وجدها بين الواقع والخيال في هذا الحوار، راه من محض الصدفة، والله يسمح لينا.
مصطفى قسيوي
* واش سي عبد الإلاه هذا غبرتي علي أصاحبي
– لا لا .. السيد الأمين العام ،هذا قيسوي جريدة لودوز.. تغلاطت ليك واقيلا؟
* وا صاحبي راه جاني صوتك في التلفون بحال سي بنكيران ، قلت مزيان ملي تفكرني نخوي عليه غير شوية من قلبي ..
– ياك لاباس آ سي نبيل ..؟
* لا لا غي مرة مرة تنشدو في العثماني شوية، وهذ ليامات راه فاقصني صراحة
– علاه ماولو ثاني أش عمل ..؟
* لا لا، ما عمل والو، غي الجايجة الله يحد الباس تقريبا شهر و الدولة المغربية نايضة ليها، هو عاد فاق وعرض علينا للإجتماع كأحزاب ممثلة في البرلمان؟
– أش، آوا تتقول، يكما ناوي تمشي راه توقف عليكم الصطافيط ويتابعوكم بقانون خرق الطوارئ، برك آلرض ولا دير راسك فيه
* لا لا راه درنا إجتماع عن بعد بواسطة فيديو كونفيروس
– فطرتو مجموعين إذن لا يديريها يرسل لكم الفطور عن بعد، مصواب تبارك الله، إيوا المعلومة صحيحة ولا لا إيوا نور الرأي العام؟
* لواه النبك، نقدر نقول لك، إلا فطرك العثماني أجي شكل ليا
– مرحبا نشكل لك، ياكما شي خطاب سياسي يفكرنا بأيام علي يعتة وعزيز بلال..، آسي نبيل ياك؟
*لا تشكل لي الحروف لي فوجهي
– آسي نبيل، كيضهر لي بلي الرأي العام ، ما بغى وجهك، بغا حقوا في المعلومة واش فطركم رئيس الحكومة من ماله الخاص، ولا من المال العام؟
*واش عرفك أنت أنه ما بغى وجهي، المؤتمر سيد نفسه
– الحاج نبيل، سبحان الله، اش دانا للمؤتمر، رجاءا جواب على السؤال ؟
*لا آ سيدي، لا هادي ولاهادي، قال لينا فقط كنت ناوي نجمع معكم، عفوا نجمعكم على طاولة الفطور، ولكن إنما الأعمال بالنيات، غير هو بان لي لشكر ما عاجبو حال.
– ما لشكر مالوا، آسي نبيل يكما نوضيتها معاه ؟
*ما عندك ما تجر لي لساني، أنا معكم ا الصحافيين درت الحجر التصريحي
– إذن عادك بنكيران حتى هو راه داير الحجر الصحي والحجر الشفوي؟
*ما داويش أنا، ها أنت يدي على فهمي
– عفاك، لا تدير يدك على فمك، الشعب اليوم بغاكم كزعماء سياسيين، تواصلوا تشراع فمكم، وتخراجو عينيكم، خاصىة الخانزين فلوس، منكم لي دخلوا للسياسية بالإركاط ودابا كيركبو الكاط كاط، وما سمعنا انهم عاونوا البلاد ولو بدرهم رمزي
*سير . ولا بلاش اللهم إني صائم
– ألو، سي نبيل، ألو السيد الأمين العام، راه حنا عاضاحكين. وسع قشابتك، ألو، ألو تقطع الخط.
