من خلال فقرة “مشاهير في الكوزينة”، نقدم لكم قراء ومتتبعي جريدتي خميسة.ما، و “le12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج والزوجة في تحمل أعباء “الكوزينة”.
حلقة اليوم مع الإعلامي بلال مرميد مقدم البرنامج الشهير FBM:
*بداية بغينا نعرفوا واش تدخل طيب في الكوزينة في رمضان و لا لا ؟
“غادي نجاوبك بكل صراحة، أنا مفضي في الكوزينة ومتنعرف ندير والو ، وتندخل للكوزينة إلا إذا كنت مضطر و مجبر وتحت الضغط باش ندخل ليها عاد كندخل وهذه حاجة ما متنفتاخرش بيها”.
*إلا سولناك اليوم أشنو وجدتي لطبلة فطور رمضان، أش غادي يكون الجواب ديالك؟
وجدنا داكشي بسيط بحال كل المغاربة وقليل يعني طبلة عادية بلا حريرة، مع بعض الأطباء الخفاف ونزيدك هاذي عامين وحتى تنوجدوا نفس الطبلة، من جهة حفاظا على الصحة وعاد هاذ شي عندنا من قديم.
*أشنو الشهيوة لي كتقن تطيبها في رمضان؟
“أتاي بوحدو غير داكشي لي كيتعلمو الإنسان مني كيكون طالب بحال هادشي لي قلتِ دابا مقالي ديال البيض و الكفتة شي حاجة بحال هاكدا و كنظن بلي خاصني نفتاتح على تعلم هادشي لأني غادي نحتاجو طبعا أما داكشي ديال نطيب الطواجن والوا بالعكس كيبان لي أنا شي أحد لي كيوجد هادشي راه شي عالم ههههه، علاقتي بالكوزينة شبه منعدمة باش نكون معاك صريح”.
حاورته: مهى الدرعي (صحفية متدربة)
